成日有人問我：AI 會唔會搶建築師份工？

你每問 AI 一條問題，背後都係呢類樓喺度做嘢。一大片灰色大盒，入面幾乎全部係機器：伺服器、電力、冷卻、後備電池、一條條電纜。美國嘅數據中心興建量預計會翻一倍，但反對聲都好大，今年幾個民調都話，大約七成美國人唔想喺自己屋企附近起。

Dezeen 9 月 29 號有篇文章，問數據中心有冇可能設計得好：
・學者 Marina Otero Verzier 直頭講：「數據中心整體嚟講，係差劣設計嘅例子。」佢仲話，如果建築師最多只係幫佢做個外牆，咁係呢個專業自己冇志氣。
・一位數據中心投資者話，以前建築師畀人擺埋一邊，因為呢啲樓一直當咗係工程項目，淨係講效率都起得成。佢打咗個幾得意嘅比喻：運算好似停車場，可以係成棟樓，亦可以係一棟樓入面嘅一部分。

我自己睇嘅角度有少少唔同。我喺英國做 Principal Designer，簡單講，就係喺設計階段諗清楚：起樓、維修、清潔嗰班人安唔安全。我未設計過數據中心，但睇呢種樓，我第一時間諗到嘅唔係外觀，而係呢幾條問題：
・成座樓差唔多全部係機器，仲要一路運作一路維修。換一部機，使唔使爬過帶電嘅設備？
・咁多電池，萬一起火，消防員由邊度入？
・工期好多時跟住通電嗰日嚟定。為咗慳幾個禮拜而做嘅決定，代價最後落咗喺邊個身上？