文章 · AI 新聞
同一部 iPhone,喺香港同喺倫敦,將來會諗得唔一樣
路透社上星期五報道,Apple 同阿里巴巴合作,為中國市場單獨練咗一個 AI 模型,係第一間獲北京批准喺當地行自己模型嘅外國公司。Apple 未回應過,所以要當傳聞睇⋯但連 Apple 都要為一個市場養多一個腦,呢件事本身已經講咗好多嘢。
同一個 icon,入面唔同個腦。
我一路留意緊嘅唔係 Apple,係我哋點同細路講 AI。我哋而家教佢哋「唔識就問下 AI」,講得就好似 AI 係本全世界通用嘅字典。但呢單新聞講穿咗:AI 助手唔係一件全球劃一嘅嘢。佢跟住你部機喺邊度賣、跟住當地規矩,長成唔同個樣。而部機唔會話你聽,你而家問緊嘅係邊個版本。
我屋企一半喺香港,一半喺英國。同一條問題,兩邊攞住同一款電話問,將來好可能得到兩個唔同嘅答案。
所以要教嘅唔係「點用 AI」,係「知唔知你而家問緊邊個」。
呢樣其實學校一直有教,只係換咗個對象⋯以前叫我哋睇報紙要諗下邊間報館、邊個立場;而家個對象變成一個好有禮貌、好肯定咁答你嘅助理。難就難喺,報紙會印住個名,助理唔會。
你哋屋企會唔會同細路傾呢啲?定係覺得佢哋大個啲先講?
