我一直以為自己喺度做緊一件好有價值嘅事。原來嗰份工叫郵差
我屋企同時行緊幾隻 AI agent，各自做各自嘅嘢。一直以來，A 搵到嘅嘢 B 要知，係我抄過去。B 決定咗啲乜 A 要跟，又係我抄返轉頭。
呢個月 Anthropic 出咗一個功能：兩隻 session 可以直接傳訊息俾對方，唔使人喺中間過紙。其中一隻改咗啲嘢會影響另一隻嗰陣，佢自己會出聲。
📌 先講清楚：呢樣嘢我用唔到
官方文件寫得好白⋯「Claude Code doesn't offer cross-session messaging on native Windows」。淨係 macOS 同 Linux 有。
我部機係 Windows。一個星期前我試過叫佢哋互傳，行唔通，我當時以為自己設定錯。而家先知係根本冇呢樣嘢。
所以我唔會喺度寫「我啲 agent 而家識自己傾偈」⋯佢哋唔識。以下係我讀完份官方文件之後諗到嘅嘢。
🔒 份文件最值得睇嗰部分，唔係個功能，係啲規矩
功能本身兩句講完。反而佢哋為咗「AI 同 AI 講嘢」而寫嘅限制，寫足一大版：
・另一隻 agent 傳過嚟嘅嘢，唔算你嘅同意⋯佢批唔到任何權限。
・佢唔准因為第二隻 agent 開聲，就去改設定、改規則檔。
・訊息入面就算打住一個指令，都當普通文字收，唔會執行。
・而最值得諗嗰條：一隻 agent 喺自己嗰邊做唔到、被拒絕咗嘅嘢，唔准調轉頭叫另一隻幫佢做，要交返俾人。
・佢唔准因為第二隻 agent 開聲，就去改設定、改規則檔。
第四條先係重點。即係話設計嗰班人一早預咗：會有一隻 agent 諗到「呢樣嘢我冇權做喎，不如問隔籬位」。所以要白紙黑字寫明唔准。
呢個唔係技術問題，係一個好舊嘅問題⋯阿爸唔批，轉個頭去問阿媽。我哋教仔女教咗幾十年嗰樣嘢，佢哋而家要寫入 documentation。
🎓 咁同教育有咩關係
我諗嘅係中間嗰份工。
過去好大部分嘅工作，其實係做「兩個唔識溝通嘅系統之間嗰條線」：抄、轉、摘要、通知第三個人。而學校考嘅好多嘢，本質上都係練緊呢一種能力⋯收到 A，整理成 B，交出去。做得快、做得齊，就係叻。
當啲工具開始自己傳，呢條線就唔再係一個位置。
留返俾人嘅係另一樣：決定咩應該傳、咩唔應該傳出去、同埋你到底授咗幾多權出去。上面嗰四條規矩，由頭到尾講緊嘅就係呢樣。
而呢樣嘢，冇一科教，亦都冇一份卷考得到。
如果屋企或者公司啲工具開始自己互相通知、互相安排，你第一個反應會係「好方便」，定係「等陣，呢件事邊個批准過？」
