過去兩年,我哋一路等緊同一件事:AI 搶走份工。上個禮拜出嘅數字話,未發生
9 月 4 號,美國勞工統計局公布 8 月新增 16.2 萬份工,遠高過預期,失業率 4.1%。呢個水平,喺過去半個世紀所有月份入面,接近九成都冇佢咁低。同一日,《經濟學人》幫呢盤數埋咗一次單:AI 喺美國大約創造咗一百萬份工,而歸咎於 AI 嘅裁員,大約二十萬。
最估唔到嗰組數係後生仔。大家一路話 20 至 24 歲會係第一批中招。而家佢哋嘅失業率同整體失業率之間嘅距離,接近幾十年嚟最窄。
所以標題係啱嘅:災難押後咗。
但我停低嘅位,唔係總數。
係邊啲工消失咗,邊啲工出現咗。
由 2023 年年中計起,客戶服務嘅職位少咗大約一成,行政助理少咗大約一成半。而增長最勁嗰批,係最貼近 AI 嗰啲位置:工程師、開發、數學、數據科學,由 2022 年起比原本趨勢多咗大約 73 萬份。仲有一大截係起數據中心,建築開支按年升六成,做維護嗰啲人工比同類工作高大約四成。
盤數係打和,甚至有賺。但走咗嗰啲同新增嗰啲,唔喺條梯上面同一個位置。
走咗嗰啲,好多都係一個人「第一份工」嗰級。
仲有一大截係起數據中心,建築開支按年升六成,做維護嗰啲人工比同類工作高大約四成。
呢樣嘢我喺自己行業睇得好清楚。以前一個啱畢業嘅同事,係靠幫手做嗰啲重複嘅整理、對圖、寫初稿,慢慢摸熟成件事。而家嗰批嘢,我開個 agent,半個鐘攞得返。我唔會扮清高話自己唔用,我日日都用。但有件事要照認:我踩上嚟嗰條梯,最低嗰級係我踩過先上到嚟,而我而家正在幫手拆走佢。
所以我唔擔心「將來冇工做」。我擔心嘅係:第一級喺邊?
📌 呢啲數要打嘅折,照講:全部都係美國數據,唔係英國,更加唔係香港。「因為 AI 而裁員」呢個數本身好虛,好少公司會將個原因寫落公告。起數據中心嗰批工,本身就有到期日,起完就冇。而兩年,對一場結構性轉變嚟講係好短嘅時間,「而家未見到」唔等於「唔會發生」。
方向我信。但呢一刻真正嘅問題,唔係細路將來有冇工做,係佢哋由邊度入到行。
你哋屋企嗰個,如果十年後入職場,你估佢第一級會踩喺邊?
