美國政府畀本土 AI 公司嘅建議入面

9 月 8 號,NSA、CISA 同 FBI 出咗一份聯合警告,點名六間中國 AI 公司:DeepSeek、Moonshot AI、Alibaba、MiniMax、StepFun、Z.AI,話佢哋由 2024 年底開始,用工業規模「蒸餾」美國嘅前沿模型,Claude、GPT、Gemini、Grok 全部有份。份文件寫嘅數量係:數以百萬計嘅來回,數以十億計嘅 token。

「蒸餾」呢個字要解一解。佢唔係入侵,唔係偷檔案,唔使掂到人哋部機。係開個正常帳戶,俾足錢,然後問問題。問夠多,將對方嘅答案攞返去教自己隻模型。你偷唔到佢副腦,你只可以問到佢自己講出嚟。

所以最耐人尋味嗰段,係防守嗰邊。原文係「Subtly alter responses」,即係微調答案:減少推理深度、用另一條路講出啱嘅結論、或者喺風格上做啲唔一致。跟住仲補多句:唔好通知對方佢俾人降咗級。

即係話,當你識嘅嘢可以靠問攞走,守得住嘅唯一方法,係教得差少少,而且唔出聲。

我睇住呢單嘢諗嘅係屋企。我兩個細路以後學嘢,坐喺對面嗰個「老師」就係呢批模型。而呢份警告等於承認咗一件事:一個識答嘅系統,係守唔住佢識嘅嘢。識答,已經唔再係本錢。剩返嘅本錢,係攞到答案之後,你分唔分得出邊個啱,同埋你攞嚟做到啲乜。

要打嘅折照講:
・呢啲係指控,未經法庭裁決,被點名嘅公司未有逐項回應。
・蒸餾本身唔係犯法,爭議喺服務條款同規模。
・份警告係美方立場,自然帶住產業競爭嘅角度睇問題。

咁問返轉頭:你日日用嗰個 AI,你點知佢今日冇 hold 住?