文章 · AI 新聞
百分之七十二嘅美國招聘經理話：會為 AI 技能俾多啲人工
數字嚟自人力顧問公司 Robert Half 上個禮拜出嘅 2027 年薪酬指南，問咗二千幾個美國嘅招聘經理、管理層同打工仔。72% 經理話，會為相關嘅 AI 技能加人工；42% 仲話，AI 技能值錢過其他技術。
但「AI 技能」即係乜？我覺得唔係識打 prompt 咁簡單。
Google 同 Ipsos 今年 2 月有份研究，將「AI fluent」定義做：用 AI 重新設計咗自己好大部分嘅工作。美國打工仔入面，得 5% 做到。呢班人話因為識用 AI 而升職嘅機會，係啱啱起步嗰班嘅四倍。
Robert Half 講僱主想要乜，都唔係講 prompt：知道 AI 喺邊度幫到手，識將佢放入日常工作，用得負責任。
我自己日日用 AI，用得最多嘅技能，其實唔係寫 prompt，係睇得出佢幾時錯。上個月 AI 幫我出咗幾張效果圖，靜靜雞少咗一層樓，望落好靚，但係錯。呢個錯，冇課程教過我點捉，係做咗咁多年建築先睇得出。
上個月 AI 幫我出咗幾張效果圖，靜靜雞少咗一層樓，望落好靚，但係錯。
所以我諗緊，我哋教緊下一代「點樣問 AI」，但真正值錢嘅，可能係「點知 AI 答錯」。而呢樣嘢，要先識咗嗰門嘢本身，先學得到。
要打嘅折照講：兩份都係美國數字；72% 係經理話「會」加，唔係已經加咗；升職嗰個係打工仔自己報嘅。
如果只可以教小朋友一樣 AI 技能，你會揀教佢「問」，定係教佢「查」？留言話我知你點睇 👇
