文章 · AI 新聞
有 43% 打工仔覺得自己嘅 AI 技能落後咗。呢個數字上咗新聞
同一份調查入面，有另一個數字冇乜人提：39% 擔心「學得快嘅同事會攞到優勢」，接近四分之一直接話自己嘅 AI 技能落後同事。
即係話，佢哋唔係同 AI 比。佢哋喺度互相比。
呢兩件事差好遠。
同工具比，你會問「呢樣嘢點用」。同隔籬位比，你會問「我係咪蝕緊底」。第一條問題令你去試；第二條令你收埋。
我教班見得最多就係呢樣。同一班人入面，進步最快嗰個唔係本身識得最多嗰個⋯係肯喺成班人面前，問一條顯得自己好唔識嘅問題嗰個。卡住嗰啲，通常諗住「我返屋企自己補返先，唔好俾人見到我唔識」。
補唔到㗎。因為你唔知自己唔知咩。
📌 講返份調查本身：訪問咗一千幾個美國打工仔，做嗰間公司本身係賣 AI 履歷工具嘅。一間靠「你要 upgrade 自己」搵食嘅公司，去量度「大家覺得自己幾落後」，我唔會當佢中立數據。
但個方向我信，因為我喺課室入面見到。
而家最貴嗰樣嘢唔係唔識用 AI。係扮識。
