文章 · AI 新聞
1770 年有部叫 The Turk 嘅下棋機器
1770 年有部叫 The Turk 嘅下棋機器,巡迴歐洲,贏過皇帝同將軍,轟動咗成個世紀。
入面坐住個真人。
2005 年 Amazon 開一個平台,明知咁擺個名落去:Mechanical Turk。Bezos 自己形容佢係「artificial artificial intelligence」⋯人工嘅人工智能。表面係電腦做嘢,實情係人喺後面做。
呢個平台上個禮拜宣布,9 月 30 號閂,行咗 21 年。
我哋今日用嘅 AI,好大部分係喺呢類平台上面訓練出嚟。標圖、聽錄音打字、答問卷、判斷一句嘢係咪惡意⋯一單幾美仙,一日做幾百單。Amazon 話有超過 50 萬人登記。學術界追過個數,同一時間真正喺線做緊嘢嘅,可能得兩三千。連「幾多人」都係一團霧⋯呢件事本身就係重點:呢層人由頭到尾都唔畀人見到。
我哋今日用嘅 AI,好大部分係喺呢類平台上面訓練出嚟。
而家唔再需要佢哋。因為佢哋教識咗嗰啲機器,已經做到佢哋嗰份工。
我唔係想講一個悲情故事。我想講個次序:每次有樣嘢睇落好似「電腦自己識」,你行入去幾層,通常都會撞到人。而嗰啲人好少留低名。
我同個仔講過一次:AI 唔係識,係學過,而佢學嗰啲嘢係人做嘅。佢問返我:「咁教佢嗰啲人而家做緊乜?」
我答唔到。
我覺得呢條問題,好過「AI 會唔會取代我」。第二條問題係問將來;第一條係問而家,而且已經有答案⋯只不過冇人講。
你會唔會同細路講埋呢一層?定係覺得佢哋大個自然會知?
