文章 · AI 新聞
LG 星期一宣布:以後唔使再寫自動化規則,同佢講就得
我睇完第一個反應係:我一條都未寫過。
8月31號、IFA 柏林開展之前,LG 出咗個叫 ThinQ Claw 嘅嘢⋯一個打字傾偈嘅 agent,坐喺屋企啲電器上面。賣點就係一句:唔使你砌規則,你話俾佢知今晚七點有客嚟,佢自己搞掂焗爐、空氣同溫度,仲會記住你鍾意乜、唔鍾意乜。LG 自己講,佢係照 OpenClaw 嗰個開源 agent 概念做出嚟。
呢單嘢對做開 smart home 嗰班人嚟講,係一個年代嘅完結。佢哋花咗十年砌 if-this-then-that:如果六點半,如果有人喺屋企,如果道門開咗超過三十秒。每撞到一個新情況,就要加多一條。條清單越砌越長,長到最後冇人夠膽郁。
呢個年代我完全冇經歷過。
唔係我叻,係我遲入場。我開始搞屋企部 agent 嗰陣,已經係 agent 年代⋯由第一日到今日,我一條 if / then / else 都冇寫過。我要乜就講乜:「聽日六點四十五叫醒我,落雨就早十分鐘。」呢句嘢喺舊年代係一條規則、一個 condition、一個 helper;而家佢就係一句說話。
條清單越砌越長,長到最後冇人夠膽郁。
我唔係想講「規則死咗」。規則仲喺度,只係寫嗰個換咗人。以前你要事前諗晒所有情況,寫成一張清單;而家你講個情況出嚟,佢即場自己拼。
要打嘅折照講:ThinQ Claw 而家淨係喺 IFA 個展區 demo,冇公佈幾時出、邊個市場出。佢係打字,唔係開聲講。而且佢住喺 LG 自己個生態入面⋯你屋企啲嘢要識講 ThinQ 或者 Homey 先玩到。我自己嗰套係開源、咩牌子都駁到,代價係每一忽都要自己執。
但佢哋講嗰個方向,同我行緊嗰個,係同一個。
我拎走嘅係另一樣嘢:一樣技能,可以喺你未學識之前就已經過咗氣。而遲入場嗰個,唔使補返嗰十年。
