成疊標書交俾 AI 睇,靠唔靠得住?
成疊標書交俾 AI 睇,靠唔靠得住?連發展局都開始叫 AI 幫手檢查標書。我整咗條 11 分鐘幾嘅講解片,放咗上 YouTube:https://www.youtube.com/watch?v=j3sLUnVBQEE

政府自己都用 AI 檢查標書
發展局技術通告(工務)第 3/2026 號(2026 年 3 月 4 日):2026 年 6 月 1 日或之後招標、預算超過 1,500 萬元嘅顧問合約同超過 3,000 萬元嘅工程合約,業主要寫明用 AI,並喺接納之前按清單嘅基本要求審核及評估顧問嘅 AI 方案。通告附嘅 AI 清單入面,項目 AI-2 就叫 Checking of Tender Document:用 RAG 或同類做法,對住標準條款搵出漏咗或者唔標準嘅地方,仲要 "with links to the source content for user’s verification",即係附上原文連結,等人自己核對。
Ctrl+F 搵字,AI 搵意思
Ctrl+F 快、準、次次一樣、唔會作嘢,但係佢淨係搵到你諗到要搵嘅字。佢會漏三種嘢:
- 條文唔用你搵嘅字。公開嘅《政府建築工程合約一般條款》(1999 年版)入面,set-off 出現 0 次,deduct 出現 16 次;第 83 條寫明業主可以喺 "any other contract between the Employer and the Contractor" 嘅錢度扣數。
- 數字喺另一份文件。延誤賠償每日幾多錢,條款喺合約,個數喺投標表格附錄;專業保險買幾多,顧問合約話睇 Brief。
- 要求係格式規矩。建築署顧問甄選手冊(1,038 頁)寫明技術建議書唔可以有任何價錢,超頁嘅部份唔睇兼扣分。
一份虛構標書嘅測試
我叫我個 AI agent 寫咗份虛構嘅標書節錄(DEMO 社區會堂顧問合約,1,507 個英文字),入面刻意收埋 23 項風險同要求,而且刻意避開關鍵字;答案表喺測試之前寫好。2026 年 11 月 15 日用 OpenAI API 實際運行:
| 做法 | 搵到(共 23 項) | 備註 |
|---|---|---|
| Ctrl+F(14 個關鍵字) | 5 | 唯一一個 liquidated damages 嘅 hit 唔係要你賠錢嗰條 |
| AI 成份放入去(gpt-5.4-mini) | 23 | 列咗 94 項,引咗 53 條唔同條款;94 條引文一字不差;原因冇評分 |
| 細啲嘅模型(gpt-5.4-nano) | 22 | 漏咗「設計要適合用途」嗰條 |
| 先揀段落(85 段只揀 6 段,刻意設細) | 2 | 有一句引文改咗字 |
Ctrl+F 快、準、次次一樣、唔會作嘢,但係佢淨係搵到你諗到要搵嘅字。
呢個係作者自檢、示範,唔係 benchmark。節錄好短,真標書長好多,唔好當 AI 次次都搵齊。
風險
- 漏:AI 冇講,唔代表冇。公司自己要有一張必查清單(頁數、銀碼、簽名、表格、補充通告、截標時間),由人逐項剔。
- 引錯:美國有研究測試專業法律研究 AI,each hallucinate between 17% and 33% of the time(Magesh et al., 2024);香港數字政策辦公室嘅生成式 AI 指引亦講明,AI 亂作嘢暫時冇辦法完全消除。每一條都要睇條號、睇原文、自己翻返去嗰頁。特別條款可以推翻一般條款,AI 未必會同你講。
- 保密:政府顧問合約限制邊個可以睇業主文件;上載去外面嘅 AI 算唔算交俾第三方,條文冇講明,先問業主。商業版同 API 官方條款話預設唔用你資料訓練,但會保留一段時間(一般最多 30 日,設有例外)。Anthropic 同 OpenAI 官方支援地區列表都冇香港(2026 年 11 月 15 日查閱)。放標書入 AI 之前,問三條問題:合約准唔准?用緊邊個服務,條款點寫?業主同唔同意?
- 邊個負責:交建築署嘅顧問標書,公司要簽聲明,話資料已經核實、真確同完整。顧問合約要求合理嘅專業技術、謹慎同盡職,冇一句話用咗軟件就例外。
AI 可以幫你睇,但係唔可以幫你負責。
幾年之後(想像,唔係預測)
星期一朝早,一份新標書落咗嚟。同事未沖好咖啡,AI agent 已經對過公司自己嘅標準條款庫,列出同平時唔同嘅地方,每項都有原文連結;佢仲列埋預期有、今次冇嘅條款,用嘅係業主書面批准咗嘅服務。然後成個 team 坐低,決定入唔入、邊個風險肯接、收費點定。最後喺聲明度簽名嘅,一定係人。
示範用嘅標書節錄、編號、日期、銀碼全部虛構;發展局、建築署、政府合約條款係公開文件。我係建築師,唔係香港認可人士;呢篇唔係法律意見。出處列喺 YouTube 片嘅說明。